Naby

Leer leef by Orban

Orban se leuse is ‘Leer Leef’: dit is ons selfopgelegde taak om elke Orban-kind te leer om te leef en om lief te wees vir leer. Ons doel is om ’n gesonde selfbeeld by elke leerder aan te wakker, terwyl ons sy of haar eiesoortige individualiteit koester. Ons beoog om elke leerder die vertroue te gee om alles waartoe hulle in staat is, te bereik. Ons wens ons leerders joie de vivre, en liefdevolle, ondersteunende verhoudings toe – op alle sosiale vlakke en dwarsdeur hulle lewens. Dit sal ’n beter samelewing vir ons almal tot gevolg hê as ons gesonde, gelukkige, produktiewe kinders grootmaak.

Ons kies om nie die klem uitsluitlik op mededinging te plaas nie, maar om ook samewerking aan te moedig – nie slegs terwyl ons kinders in Orban is nie, maar met die oog op die toekoms, wanneer hulle hulle plek in die samelewing gaan moet vul. Verhoudings, geluk en produktiwiteit ly onder suiwer mededinging, terwyl dit floreer wanneer samewerking die oogmerk is.

Ons is trots op die multikulturele karakter van ons skool: die Orban-familie sluit ’n verskeidenheid tale en kulture in, en is ’n goeie weerspieëling van Suid-Afrika se samelewing. Dit is ’n enorme voordeel om in ’n tweetalige skoolgemeenskap groot te word. Ons kinders is tuis in die wonderlike, uitdagende diversiteit van ons land en, inderdaad, die wêreld. Orban is ’n Christelik-gebaseerde skool, maar die Orban-familie sluit ’n verskeidenheid godsdienste in.